Шардара аудандық тарихи-өлкетану мұражайы аймақтағы мәдени, рухани шаралар өткізетін орталыққа айналған. Шардараның тарихын түгендеп, өткенін жаңғыртуда аталған мұражай қызметкерлерінің үлесі зор.
Таяуда мұражай қызметкерлерінің ұйымдастыруымен Шардара ауданының құрметті азаматы, «Құрмет» орденінің иегері Тұрғанбек Қанаевпен кездесу өткізілді. Ауыл шаруашылығы саласының майталман маманы ретінде танылған Тұрғанбек ағаның поэзия саласындағы еңбегі де айтылып, тұлғаның сан қыры әңгіме өзегіне айналды. Іс-шараны аудандық ардагерлер кеңесінің төрағасы Тоқсанбай Бердібеков ашып, Тұрғанбек ағаның өнегелі өмірінен түрлі мысалдар келтірсе, «Аманат» партиясы Шардара аудандық филиалының төрағасы Ережеп Бекет партия атынан Алғыс хат табыс етті. Шардара аудандық мәслихатының депутаты Талғат Жалғасбаев пен Алатау батыр ауылдық округі ардагерлер кеңесінің төрағасы Сейсен Қуан Тұрекеңнің әділдігі мен турашылдығын жоғары
бағалады.
Биыл жетпіс деген жоталы жасты бағындырып отырған Т.Қанаев жастық шағын мақта шаруашылығын өркендетуге арнағанымен, қай жерде жүрсе де қолынан қаламын тастамай, оралымды ойларын өлеңге айналдырып, елдің рухани әлеуетінің өсуіне де қомақты үлес қосып келеді. «Еңбегім – туған еліме» деп өлең жазып, еңбек адамдарын насихаттап жүрген ауылдағы ақын ағамызға біз де шығармашылық табыс тілейміз.
Ә.ӘБДІРАМАНОВ. Шардара ауданы.
