Қазақстан Республикасының Президенті Қасым-Жомарт Тоқаев 2022 жылғы 3 наурыздағы №826 «Әкімдердің халықпен кездесулерін өткізу туралы» Жарлығына сәйкес аудан әкімдері тоқсан сайын көшпелі кездесу өткізуі тиіс.
Аталған Жарлыққа сәйкес Ордабасы ауданының әкімі Нұрбек Бадырақов кезекті тұрғындармен кездесуін Шұбар ауылдық округінен бастады.
Аудан басшысы халықты толғандыратын әлеуметтік мәселелерге баса назар аудара отырып, ауданды жаңғыртудың негізгі бағыттарына тоқталды және проблемалық мәселелерді шешудің жолдары мен мерзімдерін кеңінен түсіндірді.
Атап айтар болсақ, Мемлекет басшысының “Халықтың табысын арттырудың 2025 жылға дейінгі бағдарламасы” аясында қолға алынған “Ауыл аманаты” жобасына Шұбар және Бадам ауылдық округтері пилоттық үлгіде енгізіліп отыр. Нәтижесінде, 392 жұмыс орнын ашатын 353 жоба жүзеге асырылатын болады. Өсімдік, мал, құс және балық шаруашылықтарына, сондай-ақ ауылшаруашылық кооперативтерін жабдықтауға, тұрғындардың қызмет көрсетуге арналған басқа да кәсіптеріне басымдық берілмек. Бұл алдын-ала жүргізілген сауалнаманың нәтижесінде қолға алынған бағыттар.
Сондай-ақ аудан басшысы шұбарлықтарға 40 мың басқа арналған мал бордақылау алаңы туралы ақпарат берді. Аталған алаңда мал бордақылауға ниетті тұрғындарға арнайы жер берілетіндігін, қажет болса жылдық пайызы 2,5% несие алуға үшін қажетті құжаттарды рәсімдеуге жәрдем берілетіндігін, ең бастысы — аталған жобаның ауыл тұрғындарының табысын арттыру мақсатында жүзеге асырылып жатқандығын тілге тиек етті.
Кездесуде Шұбар ауылдық округіне қарасты ауылдарға ауыз су, газ тарту, жол салу, білім және денсаулық сақтау нысандарының құрылысы бойынша атқарылып жатқан жұмыстар да баяндалды. Мәселен, осы жылы (2023 ж.) Шұбарсу а/о 7161 халқы немесе 83,2% көгілдір отынмен қамтылатын болады.
Аудан әкімінің баяндамасынан кейін кездесу сұрақ-жауап форматына көшті. Тұрғындар тарапынан жол, ФАП, жайылым жер, электр бағаналары, несиелендіру мәселелері бойынша сауалдар қойылып, олар бойынша жұмыс жүргізу үшін тиісті сала мамандарына нақты тапсырмалар берілді.
Кездесудің соңында аудан әкімі тұрғындарға жеке мәселелері бойынша қабылдау өткізді.
Аудан әкімінің баспасөз қызметі
