Арыс қаласында Т.Тәжібаев атындағы отбасы үлгісіндегі балалар ауылында Жаңа жылдық шырша өтіп, балалар шаттыққа кенелді. Мұнда 7 отбасыда 60 бала тәрбиеленеді.
Жаңа жыл мерекесін асыға күткен балғындарды қысқы ертегі кейіпкерлері қызықты да мазмұнды мерекелік бағдарламамен қуантты.
Қала әкімі Гүлжан Құрманбекова жаңа жылдық шараны тамашалап, балаларды мерекемен құттықтады.
– Құрметті балалар, менің жас достарым! Сіздерді келе жатқан жаңа 2023 жылмен шын жүректен құттықтаймын! Балаларымыз озық ойлы, білімді болсын деген ниетпен қазіргі таңда мемлекет тарапынан да, өңір тарапынан да барлық жағдай жасалуда. Бос уақыттарыңыздың тиімді болуы үшін осы жерде «Спорт», «Қылқалам», «Тігін шеберханасы», «Балалар және қолөнер бөлмесі» ашылды. Мен апайларыңыздан Сіздердің жағдайларыңызды үнемі сұрап отырамын. Олар Сіздердің жетістіктеріңізді бөлісіп, көңілімізді марқайтады. Оқуда озат болыңыздар, еліміздің мақтанышы бола беріңіздер! – деді қала басшысы.
Салтанатты жиында тәрбиеленушілер би билеп, ән шырқап, өз өнерлерін паш етті. Қала әкімі жас өнерпаздар өнерін тамашалап, оларға жаңа жылдық сыйлықтар үлестірді.
Балғын балалар бал-бұл жайнап, мерейлері тасып, ұмытылмас әсерге бөленгендерін айтып, алғыстарын білдірді.
Мереке жаңа жылға лайықты киім киген бүлдіршіндердің әсем әніне, мың бұралған биіне, жауапты жетекшілер ұйымдастырған түрлі ойындарға ұласты.
