Келес ауданында негізгі капиталға тартылған инвестиция 8,5 млрд теңгені құрады. Бұл көрсеткіш өткен жылдың тиісті кезеңімен салыстырғанда 105,2 пайызға артық орындалған. Бұл туралы ауданның кәсіпкерлік және ауылшаруашылығы бөлімінің басшысы Мадияр Әшірбаев Келес ауданының әкімі Ақментай Есбаевтың төрағалығымен өткен аппараттық жиында мәлімдеді.
Бөлім басшысының мәліметінше Келес ауданында 484 кәсіпкерлік нысан өз жұмысын жүргізуде екен. Алайда бірқатар кәсіпкерлік нысандардың құжаттары әлі күнге дейін түгенделмеген. Бұл бағыттағы жұмыстарды ширатуға ауыл, ауылдық округтерінің әкімдеріне тапсырма жүктелді. Ал жылыжай және бау шаруашылығымен айналысатын азаматтардың саны өкінішке орай тиісті межеге жетпей отыр. Аудан аумағында жыл басынан бері 29 гектар аумаққа бау шаруашылығы бой көтерген.
— Өңірімізде өз уақытында бау шаруашылығы кеңінен дамып, жетістікке жеткені бәрімізге мәлім. Осы бағытты дамытуды қолға алуымыз керек. Себебі ағын су мәселесін осы арқылы едәуір шеше отырып, шаруаларымыздың табысын арттыра аламыз. Мысалы үшін жүзім бауын субсидиялау максималды қаржыландыру құны әр гектарына 9 989 000 теңгені құрайды. Мұндай жеңілдікті шаруаларымызға түсіндіре отырып, бау шаруашылығын дамытуымыз қажет, — деді аудан басшысы Ақментай Үсенұлы.
Жиын барысында ауылдық округтерінің әкімдері көтерілген мәселе аясында сұрақтарын қойып, өз мүмкіндіктерін баяндап өтті. Жиынға аудан әкімінің орынбасарлары, аудан әкімі апппараты қызметкерлері, дербес бөлім басшылары, ауыл және ауылдық округ әкімдері, мекеме басшылары қатысып, үш мәселе қаралды.
