25-қазан Республика күніне орай Ордабасы ауданының орталық алаңында “Менің Республикам-менің Қазақстаным!» атты мерекелік шара өтті.
Аталған шараға аудан әкімі Нұрбек Бадырақов қатысып, оқушылардың сурет көрмесімен танысты. Сондай-ақ біраз жылдық үзілістен соң ортамызға қайта оралған ұлттық мереке “Республика күнімен” аудан тұрғындарын, оқушы жастарын құттықтап, сөз сөйледі.
Мерекелік шарада аудан басшысы мен ауданның зиялы қауым өкілдері үздік оқыған 5 -сынып оқушыларына “Жас ұлан” қатарына қабылдануларына орай арнайы галстуктерін тақты.
“Республика күніне” орай өткізілген шарада Құрманғазының «Сарыарқа», «Адай» күйлері орындалды. “Менің Республикам- менің Қазақстаным!» атты Әскери жетекшілер бастаған, Ш.Уәлиханов атындағы мектеп-гимназиясы, Амангелді, С.Нұрмағамбетов атындағы және «Темірлан», «Бәйтерек» жалпы орта мектептерінің ұстаздары мен оқушыларының мерекелік шерушілері өз өнерлерімен, құттықтауларымен маңыздылығын көрсетті.
Шара соңы мерекелік сазды концертке ұласты.
Аудан әкімінің баспасөз қызметі
