Түркістанда БҰҰ Балалар қорының (ЮНИСЕФ) Қазақстандағы Өкілдігі «Әл-Фараби атындағы Қазақ Ұлттық университеті» КЕАҚ-мен және оқушылар сарайымен бірлесіп, ғарыштық технологиялар бойынша UniSat білім беру хабын ашты. Хаб түркістандық оқушы қыздар арасында STEM білім беруді ілгерілету алаңына айналады. Яғни, облыс орталығының оқушылары STEM курстарына қатысып, инженерлік дағдыларды игере алады.
Хаб жұмысы бірінші кезекте мектеп оқушылары арасында ғылым, технология, инженерлік-математика (STEM) саласындағы білім мен мансапты танымал етуге бағытталады. Дүниежүзілік экономикалық форумның мәліметі бойынша, STEM саласындағы жоғары оқу орындарын қазақстандық қыздардың 14 пайызы ғана бітірсе, ерлер арасында бітірушілер көрсеткіші 37 пайызды құрайды.
«UniSat бағдарламасын ЮНИСЕФ Әл-Фараби атындағы ҚазҰУ-мен серіктестікте 2020 жылдан бері жүзеге асырады. Осы уақыт ішінде 2000-нан астам қызды онлайн режимде, 200-ден астам қызды оффлайн режимде оқытып, стратосфераға 5-тен астам наноспутникті ұшырды. Бірақ одан да маңыздысы, біздің жобаның түлектері мектептен кейін STEM саласында оқуын жалғастырды. UniSat жобасы дамып келе жатқанына және инженерлік ғылымдар мен STEM-ді қазақстандық оқушылар арасында ілгерілетуді қалайтын серіктестер саны үнемі өсіп келе жатқанына қуаныштымын», — деді Қазақстандағы ЮНИСЕФ өкілі Артур ван Дизен.
Хаб спутниктік технологиялар саласындағы инженерлік дағдыларды дамыту бойынша ғылыми-білім беру орталықтары жұмысының қағидаты бойынша құрылды. Ол жердегі де, ғарыштағы да радиохабар тарататын құрылғыларынан аналогтық және цифрлық радиосигналдарды беруге және қабылдауға мүмкіндік береді.
Хаб UniSat білім беру бағдарламасының мақсаты наноспутниктерді әзірлеу саласында қыздардың білімі мен құзыреттілігін дамыту, сондай-ақ командалық жұмыс, шешендік өнер, тайм-менеджмент және шығармашылық сияқты дағдыларды жетілдіру болып табылады. UniSat бағдарламасы «Dubai Cares» халықаралық білім беру қорының, Clé de Peau Beauté брендінің және филантроп Назанин Алакияның қолдауымен іске асырылады.
